O Concello de Culleredo retirará a condición de dous fillos adoptivos e cambiará o nome de dúas rúas en cumprimento da Lei de memoria democrática. O alcalde, José Ramón Rioboo, sinalou que se trata dunha “medida firme en cumprimento da lei como acto de xustiza e dignidade”. O rexedor fixo especial mención ao traballo realizado polo historiador municipal, xa xubilado, Carlos Pereira, cuxa investigación sobre os efectos do franquismo en Culleredo serviu de base para estas propostas.
Os dous recoñecementos como fillos adoptivos serán retirados a Ricardo Catoira Garaboa, título aprobado no pleno do 16 de xuño de 1955, e a Diego Salas Pombo, que databa do 24 de marzo de 1945. Segundo remarca o consistorio, ambos contan cunha biografía que demostra o seu rol directo co movemento. No caso de Ricardo Catoira, sinálase a súa relación persoal con Francisco Franco, ao que acompañou xa na Guerra Civil desde Burgos, e a súa mención na sentenza do Pazo de Meirás como peza fundamental na xestión do inmoble ao longo dos anos.
Pola súa banda, Diego Salas ocupou postos relevantes durante o franquismo, como gobernador civil de varias provincias e vicesecretario xeral de FET e das JONS. En canto ao rueiro municipal, as mudanzas afectarán á rúa Sanjurjo de Carricarte, no Burgo, e á rúa Alcalde Narciso Pardo, en Liñares. Estas actuacións buscan eliminar a simboloxía vinculada á ditadura e garantir a reparación das vítimas conforme á normativa vixente.
