Axentes da Policía Nacional detiveron na Coruña a un home como presunto autor dun delito de falsidade documental, por empregar a cidadáns estranxeiros utilizando, supostamente, a identidade de terceiras persoas. A investigación, bautizada como Operación Marka, foi levada a cabo polo grupo 2 da UCRIF, e iniciouse tras a denuncia dun cidadán estranxeiro que, ao consultar a súa vida laboral, comprobou que fora dado de alta na Seguridade Social por unha empresa en datas nas que se atopaba traballando noutra compañía distinta, fóra de España.

A empresa, dedicada a labores de limpeza e mantemento, empregaba a cidadáns de orixe estranxeira utilizando documentos de identidade de antigos traballadores. Segundo explicou a Policía, o empresario actuaba así coa intención de aforrarse a contía dos cursos de preparación necesarios para o desenvolvemento da actividade laboral, obrigatorios para os novos empregados; así como o custo de dalos de alta na Seguridade Social o tempo de realización dos mesmos. Deste xeito, daba de alta novamente a antigos empregados que xa realizaran estes cursos.

Con iso prexudicaba, por unha banda, aos traballadores, que eran contratados na crenza de que o empresario realizaba todos os trámites para dalos de alta na Seguridade Social e, posteriormente, descubrían que desenvolveran un traballo polo que non xeraban os correspondentes días de cotización, xa que estes derivaban nos auténticos titulares das altas. Polo outro, prexudicaba ás empresas para as que realizaba os mantementos, xa que eludía os sistemas de control destas ao estar a desenvolver a súa actividade con persoal non cualificado nos cursos en seguridade laboral previamente esixidos, co consecuente risco á súa vez para a saúde dos empregados.

Ademais, varios dos traballadores foron despedidos cando detectaron que no seu contrato figuraba o nome dun terceiro e o empresario negouse a emendalo.