Anunciaba hai a comezos de mes o goberno estatal o proxecto para aproveitar o solar que Defensa mantiña na rúa Adelaida Muro (en Monte Alto), para construír un bloque de 11 vivendas de alugueiro asequible.
Ante este proxecto, a plataforma cívica Defensa do Común e a asociación veciñal de Atochas-Monte Alto, piden que a SEPES reserve no proxecto técnico unha planta, polo menos, para equipamento social, respectando así o acordo do Pleno de 14 de xaneiro de 2019 de construír un Centro Social.
Lembran que esa mesma rúa (onde agora hai pisos de luxo) tivo un Asilo, cun claro apoio popular no barrio de Monte Alto e en toda A Coruña. O manifesto “Adelaida Muro: monumento á xenerosidade”, asinado en 2001, era apoiado por 85 entidades da Coruña, con máis de 1300 sinaturas pedindo a rehabilitación e conservación do asilo como equipamento público fronte a demolición. Máis de 3.000 participaban o mesmo 12 de xuño de 2001 nunha manifestación contra un derrubamento que non puideron evitar, por mor da especulación. Un derrubamento que segue sendo entendido no barrio como “un acto de barbarie e incultura, unha agresión ao noso patrimonio, que acababa con todo un símbolo de máis de cen anos de solidariedade”.
Lembran tamén as concentracións convocadas por Defensa do Común e a AV de Atochas Monte Alto realizadas en xaneiro de 2019 e maio de 2023, diante da parcela de 373 metros cadrados que tiña o Ministerio de Defensa na rúa Adelaida Muro, pedindo a súa devolución ao patrimonio do concello da Coruña.
Máis novas
Presentan as 11 novas vivendas de alugueiro asequible no solar de Defensa en Adelaida Muro
