O grupo de delitos contra o patrimonio da Policía Xudicial da Garda Civil da Coruña desarticulou unha rede delituosa especializada no roubo de vehículos de gran cilindrada, coa detención e investigación de seis persoas.

A actuación da Garda Civil, Operación Rocho, comezou tras a denuncia do roubo dun vehículo ‘superdeportivo’ durante a madrugada o pasado mes de xuño no Pino. Os autores do roubo utilizaron unha chave orixinal, obtida a través do anterior propietario do coche, e así puideron levar o vehículo, que estaba aparcado na vía pública, sen forzar os sistemas de seguridade.

Tras a subtracción, o coche foi trasladado a unha zona illada do municipio de Negreira, onde os delincuentes realizaron un proceso de modificación técnica para evitar a súa detección. Para iso, retiraron elementos aerodinámicos, láminas de vinilo (para recuperar a cor orixinal da carrozaría), e substituíron as placas de matrícula polas doutro vehículo da mesma marca e modelo. Igualmente, manipularon o número de bastidor mediante a técnica do troquelado.

Dous días despois do roubo, o coche foi trasladado desde Galicia ata a Comunidade Valenciana. Finalmente, foi localizado e recuperado na illa de Eivissa o pasado mes de agosto, tras pasar por varios puntos da xeografía española para ser ocultado. A Garda Civil detivo ao xefe deste grupo delituoso, un veciño de Oroso (A Coruña) de 29 anos de idade, e tamén actuou contra outras cinco persoas pola súa participación no roubo, as modificacións no coche e o seu traslado.

Os investigadores impútanlles supostos delitos de roubo de uso de vehículo a motor, falsificación de documento público e pertenza a grupo criminal. As actuacións foron postas en coñecemento do Tribunal de Instancia de Arzúa.