Un dos estudios que máis se preocupa polo devir socio-urbanístico da cidade e que demostra sempre a súa vontade por aportar a súa visión en asuntos urbanos conflitivos e con impacto social é o colectivo Ergosfera, que en colaboración coa delegación herculina do Colexio de Arquitectos de Galicia (outra das entidades que amosa con rotundidade a súa posición crítica en proxectos como a fachada marítima), acaban de publicar coa axuda tamén de Benedito Álvarez (Defensa do Común) un estudio sobre o impacto das Vivendas de Uso Turístico (VUT) na cidade da Coruña.
Levan analizando dende finais de 2023 a evolución do número de vivendas así como da ubicación, e veñen de lanzar un “seguimento cartográfico” que serve para avaliar a real incidencia das VUT no aumento do prezo do alugueiro e no “acceso popular á vivenda”.
Os datos reflicten un aumento continuo (superando sempre o 24% anual) dende 2017 ata o 2024, onde coincidindo coa aprobación definitiva en pleno da Ordenanza reguladora das VUT, a curva comeza a cambiar a tendencia, chegando a baixar mesmo un 2% nos últimos 6 meses de 2025.
A cifra está estancada entre as 1.300 e as 1.400 vivendas de uso turístico, o que supón un 5% do total de vivendas en réxime de alugueiro (unhas 24.600 que situaba o IGE en 2021).
O colectivo valora a normativa como “un paso moi importante para a transformación do modelo que permitiu un crecemento continuo de VUT con cifras de incrementos anuais enormes”. Pero con todo, o grupo é prudente e recoñece que nos últimos 9 meses “o ritmo de recuperación de vivendas para o mercado do alugueiro residencial ou, como mínimo, o ritmo de desaparición de VUT da listaxe oficial do REAT, non parece que se corresponda coa realidade normativa vixente”.
Entende pois o colectivo de urbanistas que a aplicación da Ordenanza é, por agora, “ineficaz” á hora de facilitar o acceso á vivenda ás clases máis populares. Nese sentido critican a falta de apoio da Xunta, que é quen controla o REAT e a encargada de aplicala con controis e sancións para o seus incumprimentos, algo que por agora non está facendo, provocando unha menor incidencia da Ordenanza.
En calquera caso, valora que “aínda que o impacto das VUT no acceso popular á vivenda (pola redución do parque de viviendas dispoñible para alugueiro residencial e polo incremento xeral dos prezos da vivenda en alugueiro) é xa un consenso científico e incluso xurídico (non político), os impactos do fenómeno son varios (na convivencia nos propios edificios, na vida urbana dos barrios sobresaturados ou nas economías públicas e privadas da cidade) e, polo tanto, tamén son diversas as perspectivas desde as que se poden analizar as VUT”.
Podedes ver no blog do estudio a análise completa, que nos serve para analizar en conxunto con outros datos moi importantes a nivel social, como as 30.000 vivendas baleiras que seguen paralizando a cidade; a expansión dos grandes “tenedores”, ou o impacto de grupos empresariais cun gran número de empregados con soldos máis altos que a media como Inditex, Abanca ou mesmo Estrella Galicia.
Máis novas
Máis de 700 vivendas de uso turístico na Coruña non cumpren a ordenanza municipal
A Coruña Pública: a cartografía dos espazos públicos da cidade que busca financiamento
O “evento cidadán” da Comisión Coruña Marítima búrlase do significado de participación cidadá
