A filtración dun informe do Interventor sobre a Liquidación de 2025 do Concello da Coruña vén de facer saltar todas as alarmas no seu da oposición. Tanto BNG como PP veñen de facer crúas roldas de prensa nas que critican a falta de información sobre o estado da economía municipal, ao coñecer o “buraco” económico xerado por un remanente negativo co que se pechou o exercicio pasado e que os populares sitúan en 9,66 millóns.
Dende o PP, o seu portavoz municipal, Miguel Lorenzo, esixiu coñecer o informe do interventor sobre a liquidación do ano pasado “porque o buraco económico podería impedir solicitar os 40 millóns do préstamo para investimentos deste ano, ademais dos recortes para compensar o déficit”, sostén nun comunicado.
“Sabemos que o exercicio se pechou con remanente negativo de 9,66 millóns de euros e que implicará recortes, pero descoñecemos o informe do interventor de estabilidade orzamentaria que acompaña á liquidación sobre do incumprimento da regra de gasto e de estabilidade orzamentaria”, engade.
Pola súa banda, en rolda de prensa, os nacionalistas instáronlle a “mover ficha” e a especificar “como pensa resolver este buraco do orzamento de 2025”. “Non é confiable, é un goberno que está a fallar no grande, no mediano e no pequeno”, asegurou a concelleira nacionalista, Avia Veira, que será a candidata do BNG á Alcaldía da Coruña.
“Quen ten que mover ficha é o goberno local, ten que pór unha proposta sobre a mesa e, a partir de aí, negociar co BNG”. “Non é de recibo pasar esta pataca quente ao próximo mandato, ao goberno local que salga das urnas de 2027”, sentenciou o edil Francisco Jorquera.
