O Ateneo Aurora e o colectivo Refuxios da Memoria, convocan para este vindeiro domingo, día 19 de abril, ás 12.30 horas, diante do monumento ás misteiras da praza de Monforte da Coruña, un acto público de lembranza á folga das operarias da fábrica de mistos que nos meses de abril e maio de 1901 desenvolveron unha folga que foi prólogo da masacre obreira de maio de 1901.
Este acto forma parte do amplo programa de actividades que ao longo do presente ano lembrarán os sucesos de maio de 1901 na nosa cidade. Este programa está impulsado por unha comisión de entidades culturais, sindicais, etc. entre os que se atopan, xunto a Refuxios da Memoria e o Ateneo Aurora, os sindicatos CGT e CNT, xunto a organizacións libertarias como Xesta e Naide e a editorial anarquista Bastiana.
O programa deseñado para esta aniversario lembrará como nos días 30 e 31 de maio de 1901 tivo lugar unha folga xeral de tres días, a primeira en Galiza, en solidariedade e condena polo asasinato dun folguista durante a chamada “folga dos consumeiros”. Esta folga xeral paralizou por completo a actividade da cidade e milleiros de persoas acompañaron o corpo do obreiro asasinado ata o cemiterio. A declaración de estado de guerra foi seguida dunha brutal represión que deixou sete persoas falecidas, ducias de feridos e feridas e as cadeas ateigadas de presos e presas, que serían xulgados por consellos de guerra e condenados a penas de ata 20 anos de reclusión. En 1906, a iniciativa das Sociedades obreiras e por subscrición popular, levantouse un monolito no cemiterio de Santo Amaro en lembranza das vítimas.
Máis novas
O BNG pregunta polo incumprimento da Lei de Memoria Democrática
Culleredo retira honras franquistas e cambia o nome de dúas rúas por memoria histórica
As historias das loitas das traballadoras da Coruña: “Non Calarás non é unha exposición máis”
