Avanza, ante a ollada de toda a cidade, o delirio urbanístico de Visma. Máis de 30 edificios e preto de 4.000 vivendas asolagan o que puido ser o gran parque que unise os barrios da Agra do Orzán, Labañou, A Gramela e Visma.
Unha megaurbanización, da envergadura do barrio dos Rosais, creado nos anos 90, ou de Novo Mesoiro, nos 2000, que agocha tesouros patrimoniais. Veremos como queda mergullada no mar de asfalto a arqueta dos Frades, a segunda fonte da historia da cidade, e de onde partía o acueducto que aínda hoxe queda erguido no Paseo das Pontes. E veremos tamén que fan as administracións co novo achádego, feito público unicamente por La Opinión da Coruña.
Segundo sinalan arqueólogos da provincia de forma anónima (hai contratos de confidencialidade asinados), as obras descubriron, preto do Ágora, uns restos arqueolóxicos que inclúen dúas cabanas e unha cista funeraria, unha tipoloxía de enterramento individual datada na Idade do Bronce.
“Trátase dunha serie na que se ve a cista antes e despois de serlle retirada a lousa de cobertura á caixa de lousas na que estaría enterrado un cadáver ou, se xa se empregou o rito de incineración, as súas cinzas”, explica o que foi o arquitecto municipal José María Bello. Bello, baseándose nas teses de Ana M. S. Bettencourt, data a cista aproximadamente entre o 1600 e o 2000 a.C. Un resto arqueolóxico importante para a cidade”, para o que piden transparencia.
Segundo fontes da Consellería de Cultura, os traballos realízanse baixo control arqueolóxico e os achados xa foron comunicados á Dirección Xeral de Patrimonio Cultural, como establece a normativa vixente, segundo concreta Historia de Galicia.
Máis novas
Aprobada a primeira licenza do “delirio urbanístico” de Visma
