No marco do programa “Ondas de Cambio”, o espazo de intervención cultural da UDC Normal acollerá o vindeiro día 15 de maio un foro dirixido a axentes e profesionais para compartir ferramentas e estratexias innovadoras que impulsen a educación en igualdade e diversidade afectivo sexual e de xénero e a prevención das violencias machistas desde a adolescencia e a mocidade.

Organizado pola cooperativa Aventeira, este necesario foro busca formar persoal técnico de igualdade, educadores e educadoras, persoal de puntos violeta e, en xeral, profesionais do campo da educación e sensibilización en materia de igualdade, diversidade e violencias machistas.

Na sesión participarán voces expertas como as do investigador, divulgador e formador en masculinidades igualitarias Lionel Delgado, colaborador do Proxecto Broders, e mais a de Jimena Cardona Felipe, Premio Valedora do Pobo en 2025 polo seu TFG de investigación “Violencia na pornografía e o seu impacto nas prácticas sexuais dos mozos  universitarios/as: Un estudo cualitativo na UDC”. A través de mesas participadas, as e os profesionais afondarán en temas como a normalización da pornografía como principal fonte de coñecemento afectivo-sexual na mocidade, as violencias dixitais ou as reaccións antifeministas e discursos negacionistas das violencias machistas.

O programa, orientado á análise colectiva das resistencias, necesidades e desafíos aos que se enfrontan as e os profesionais nestas materias, así como á identificación de estratexias e ferramentas de intervención exitosas no ámbito socioeducativo, contará para o acto inaugural coa vicerreitora de Igualdade e Diversidade da UDC, Cristina López Villar, e pecharase coa actuación da poeta e música Lucía Aldao.

A inscripción, aberta e gratuíta, xa pode realizarse a través da web de Aventeira