O Acuario da Coruña acolle unha nova foca, chamada Jinzi, e que, segundo o consistorio, “permitiu rexuvenecer o grupo que habita no recinto e abre a posibilidade de que poidan volver criar”. A mesma chega como resultado dun intercambio co Oceanográfico de Valencia, onde agora viven dúas focas macho do Acuario da Coruña: Fermín (de 17 anos) e Altair (de 23 anos). Jinzi é un macho novo —cumprirá cinco anos en xullo— e xa pesa 80 quilos. Desde a súa chegada, explican desde o Concello, mostrouse “curioso coa súa contorna e moi sociable cos seus compañeiros”. Neste momento, o grupo de focas que alberga o acuario coruñés consta de dous machos e oito femias. O último nacemento rexistrado tivo lugar en xullo de 2009.