Os traballadores da refinaría de Repsol na Coruña votarán este xoves, 30 de abril, se convocan unha folga indefinida, en resposta á situación que atravesa o complexo industrial “tras anos de reestruturacións e perda progresiva de postos de traballo”.

A proposta, impulsada polo comité de empresa a petición do sindicato STR, “responde a anos de recortes, aumento de carga de traballo e deterioración das condicións operativas”, informa o sindicato nun comunicado. STR advirte dunha redución continuada de postos, acompañada dunha maior carga de traballo, externalización de funcións e “unha deterioración progresiva das condicións laborais”.

Para os representantes do STR na refinaría da Coruña, a situación alcanzou un punto límite. “O persoal está a soster a actividade con menos recursos, máis presión e maiores esixencias. Non estamos ante un axuste puntual, senón ante unha tendencia que pon en risco a seguridade, a saúde dos traballadores e o futuro industrial do complexo”, alerta. “Non se pode xestionar unha refinaría coma se fose unha estrutura administrativa. Aquí falamos de procesos críticos onde a experiencia, a coordinación e os equipos dimensionados son claves para garantir a seguridade”, critica STR, que pide “un proceso de diálogo real”.

POSTURA DE REPSOL

Pola súa banda, Repsol explica que “o complexo procederá ao cesamento definitivo dunha unidade de calcinación que levaba varios anos fóra de operación e o persoal da quenda asociada ao único posto desta unidade será recolocado noutras posicións dentro do propio complexo, sen impacto no emprego”.

“A medida definiuse tras unha análise técnica detallado, garantindo a seguridade das persoas e das instalacións e sen incremento das cargas de traballo nas unidades en operación”, agrega. A compañía informou previamente o comité de empresa.