Azúcar Moreno, Soraya, María Isabel e Jorge González súmanse ao cartel do Atlantic Pride 2026, que celebra a súa sétima edición do 5 ao 12 de xullo na cidade da Coruña. Segundo sinala a organización, a vindeira cita contará con propostas de pop, nostalxia, baile e cancións que se converteron en auténticos himnos para diversas xeracións.
Xunto a estas figuras do panorama musical, tamén confirmaron a súa presenza diversos DJ’s de referencia da escena estatal e galega, entre os que destacan Ouro Jondo, Dennis Moore, Paola, DJ Cés, DJ90, DJ Licho e DJ Flashback. Esta oferta electrónica complementará os concertos principais nunha edición que busca consolidar a cidade herculina como epicentro da diversidade durante o verán.
O ‘Orgullo do Norte’ reafírmase como un festival pioneiro, gratuíto e inclusivo. Esta iniciativa, que xurdiu na Coruña no ano 2019, ten como obxectivo principal reivindicar a liberdade afectiva, sexual e de identidade desde unha perspectiva lúdica. Ao longo dos seus sete anos de traxectoria, o certame logrou converterse nun referente grazas á súa capacidade para combinar a festa co compromiso social e a visibilidade do colectivo LGTBI+.
Participaron na presentación a alcaldesa da Coruña, Inés Rey, e os directores do Atlantic Pride, da Asociación Orgullo Coruña (ORCO), Iván Cervo, César Pérez e Luís Pazos. Xunto a eles, participaron tamén no acto a directora de Promoción de Turismo de Galicia, da Xunta de Galicia, Carmen Pita; a deputada de Cultura da Deputación da Coruña, Natividade González; e o director de Activación en Iberia de Hijos de Rivera, Víctor Mantiñán.
