A portavoz nacional do BNG, Ana Pontón, reivindicou a Avia Veira como a candidata a alcaldesa que pode facer que A Coruña “dea un paso adiante”. Mentres, a concelleira comprometeuse a traballar por unha “cidade mellor” ante un goberno local socialista que considerou “esgotado”. Foi nun acto no barrio de Monte Alto de presentación da candidatura e no que Pontón asegurou que Avia Veira “ten a forza, o proxecto e o liderado que se necesita” e insistiu en que a candidata nacionalista para as próximas eleccións municipais “vai a por todas” cun proxecto que poña aos veciños no centro das políticas.
“Avia Veira é unha muller honesta e traballadora que exerce a política de verdade, de proximidade, pegada á rúa, mirándolle aos ollos á xente”. Tamén reivindicou a xestión do BNG. “Sabemos transformar en positivo, xestionar con eficacia e con honestidade cada euro para mellorar a vida da xente”, dixo nun acto no que tivo palabras de agradecemento e recoñecemento para o candidato nacionalista e tamén edil nas últimas eleccións municipais, Francisco Jorquera. Isto nunha intervención con alusión ao obxectivo do BNG de recuperar a fachada marítima para os veciños. Neste sentido, apelou á necesidade dun “cambio de rumbo” fronte ás políticas de socialistas ou de populares.
COMPROMISOS DA CANDIDATA
Pola súa banda, a candidata á Alcaldía da Coruña, Avia Veira, avanzou que quere ser a alcaldesa que lidere “un proxecto ilusionante” pensado para “os barrios da Coruña e non para os intereses duns poucos”.
Fronte a un goberno local “esgotado, sen ideas e desconectado da realidade das coruñesas e coruñeses”, defendeu que o BNG busca gobernar na cidade cunha alcaldesa “próxima”. Foi nun discurso con críticas tamén ao PP, do que manifestou que “representa o pasado”.
