Fronte común do tecido empresarial herculino ante os novos atrancos para o desenvolvemento enerxético. A Cámara de Comercio da Coruña e a Confederación de Empresarios da Coruña (CEC) uniron as sūas voces para demandar de forma urxente cambios estruturais nas condicións de acceso á rede eléctrica. Segundo sinalan ambas as dúas entidades, a regulación actual supón unha penalización directa para aqueles proxectos industriais que achegan un alto valor engadido á economía local.
UN CAMBIO LEGAL QUE CORRIXE ERROS PERO SUPÓN NOVOS ATRANCOS
A través dun comunicado conxunto, os representantes empresariais lembran que o modelo tradicional de acceso á rede para a demanda industrial viña presentando desde hai tempo determinadas disfuncións organizativas. O principal problema residía en que as regras do xogo facilitaban un efeito acaparador, motivado directamente por un sistema de adxudicación baseado na concorrencia non competitiva.
Para tentar emendar estas eivas, o recente Real Decreto-lei 07/2026 introduciu modificacións de calado no réxime económico de acceso e conexión á rede eléctrica, afectando de forma directa a calquera nova demanda industrial que queira establecerse no territorio.
PENALIZACIÓN PARA OS PROXECTOS A LONGO PRAZO
Malia que os empresarios coruñeses comparten a necesidade de solucionar os fallos do modelo anterior, advirten con preocupación de que a solución aplicada introduce unha barreira económica excesiva. Desde a Cámara de Comercio e a CEC sinalan que o novo marco normativo establece un incremento moi significativo do custo inicial de electrificación para todas aquelas industrias que estean a planificar a súa implantación ou que precisen ampliar o seu consumo eléctrico actual.
Este encarecemento resulta especialmente prexudicial para os proxectos industriais de gran envergadura que, pola súa propia natureza, requiren dun período de execución e maduración elevado no tempo. Por este motivo, o empresariado da Coruña reclama axustes institucionais para evitar que a nova normativa se converta nun freo para o investimento e a creación de emprego no sector secundario.
