A Audiencia Provincial da Coruña acollerá o vindeiro martes e mércores o xuízo contra un home acusado de secuestrar, agredir, atar e violar unha muller respecto da cal tiña en vigor unha orde de afastamento e prohibición de comunicación.
Segundo recolle o escrito de acusación do Ministerio Fiscal, o procesado mantivera desde unha data non determinada de 2022 unha relación sexual esporádica coa vítima, á que coñecera a través dunha web de contactos. Con anterioridade aos feitos que agora serán xulgados, ambos tiveran un incidente en Portugal que derivou nunha resolución xudicial pola que se lle impuxo ao home a prohibición de aproximarse e comunicarse coa muller.
A pesar desa medida cautelar, a Fiscalía sostén que, desde polo menos o 16 de decembro de 2022, o acusado acudiu con regularidade ás localidades de Arteixo e A Coruña. Nesas visitas, segundo o Ministerio Público, chegou a verse coa muller en varias ocasións, mantendo nalgunhas delas relacións sexuais consentidas.
O episodio principal produciuse o 21 de decembro de 2022, cando, de acordo co relato da acusación pública, o procesado se desprazou de novo á cidade da Coruña. O fiscal afirma que o home estivo “merodeando polas inmediacións do domicilio” da vítima e que se aproximou a ela cando paseaba o seu can.
Nese momento, segundo o escrito, o acusado instouna a subir á súa furgoneta, algo que a muller fixo “polo medo que lle inspiraba”. A partir de aí, ambos desprazáronse por diferentes puntos da cidade, tanto a pé como no vehículo.
A Fiscalía mantén que, nalgún momento desa noite, o home actuou contra a vontade da vítima e inmobilizouna de pés e mans empregando unhas bridas que levaba na furgoneta. Tamén o acusa de golpeala cunha botella de cristal e de agredila sexualmente.
Posteriormente, segundo a versión do Ministerio Público, o procesado puxo en marcha a furgoneta coa muller atada e ferida na parte traseira e dirixiuse cara a Lugo pola A-6. Durante o traxecto, o vehículo sufriu unha avaría que o obrigou a deter a marcha no arcén e pedir axuda a outros condutores.
Foron precisamente as persoas que pararon para auxiliar o acusado as que advertiron que da parte traseira da furgoneta caía sangue. Tras decatarse da situación, avisaron as forzas da orde pública.
O home fuxiu a pé cara ao monte, segundo recolle a acusación, pero foi detido ese mesmo día no municipio de Arteixo.
PETICIÓN DE 17 ANOS E MEDIO DE PRISIÓN
O Ministerio Fiscal considera que os feitos son constitutivos dun delito de agresión sexual, dun delito de detención ilegal, dun delito de lesións agravadas e dun delito continuado de quebrantamento de medida cautelar.
Por todo iso, solicita para o procesado unha condena de 17 anos e medio de cárcere. O xuízo celebrarase en dúas sesións, previstas para o martes e o mércores na Audiencia Provincial da Coruña.
