Persoal investigador do Centro Interdisciplinar de Química e Bioloxía da Universidade da Coruña desenvolveu unha nova estratexia para transportar material xenético ao interior das células. O avance baséase no uso de vesículas formadas por lipopéptidos catiónicos autoensamblables, segundo informou o reitorado coruñés.

A UDC destaca que o traballo representa un avance no desenvolvemento de sistemas non virais para a terapia xénica, un dos campos con maior potencial para o tratamento de enfermidades de base xenética e para a medicina rexenerativa. “Un dos principais obstáculos da terapia xénica consiste en conseguir que o ADN ou o ARN chegue ao interior das células de forma eficiente e segura”, explica a Universidade da Coruña.

Neste contexto, o equipo desenvolveu dous tipos de lipopéptidos catiónicos autoensamblables, moléculas híbridas que combinan compoñentes lipídicos —graxas— e peptídicos —proteínas—. Grazas á súa carga positiva, estes sistemas son capaces de atraer e encapsular o material xenético.

Ao mesmo tempo, a súa estrutura permítelles organizarse espontaneamente en vesículas estables, o que facilita a súa interacción coas células. Esta estratexia abre así unha vía prometedora para avanzar en métodos de transporte xenético máis seguros, ao evitar o uso de vectores virais e contribuír ao desenvolvemento de futuras aplicacións terapéuticas.