Un home faleceu este mediodía na Coruña por unha ferida de arma branca no pescozo. Nestes momentos, a Policía Nacional investiga o sucedido, en principio, como unha morte violenta, aínda que polo momento non se produciron detencións. Nese sentido, o 061 solicitou, a través do 112 Galicia, a intervención das forzas da orde por un suposto apuñalamento na Travesía dos Rosales, segundo a información trasladada pola central de emerxencias. Ata o lugar acudiron patrullas da Policía Local e da Policía Nacional. Á primeira hora da tarde, a Policía Científica, a comisión xudicial e o médico forense dirixíanse ao lugar para determinar as causas do sucedido. A operación permanece baixo segredo de actuacións, segundo ratificaron fontes oficiais.