A alcaldesa da Coruña, a socialista Inés Rey, insistiu en que a dimisión da concelleira de Infraestruturas e Mobilidade, Noemí Díaz, presentada recentemente e que se fará efectiva na próxima sesión plenaria, “está baseada en motivos persoais”.

Así o explicou en declaracións aos medios de comunicación e ao ser cuestionada, entre outros aspectos, polas palabras do alcalde de Culleredo, José Ramón Rioboo, quen eloxiou nas redes sociais o labor da concelleira.

“O tempo adoita poñer cada un no seu sitio”. “Estou convencido de que o paso dos meses axudará a entender moitas cousas”, sinala nunha parte das mesmas.

Sen entrar a valorar estas afirmacións, a rexedora insistiu en que se deron “todas as explicacións que se poden dar sobre unha decisión baseada en motivos persoais”. Tamén engadiu que o goberno local “segue traballando con normalidade” e sen comentar “especulacións ou rumoroloxía”.