Dous veciños de Carballo, de 24 e 32 anos, sobre os que pesaban ordes xudiciais de procura, detención e ingreso en prisión, foron arrestados pola Garda Civil en Padrón tras varios meses en paradoiro descoñecido. A operación foi levada a cabo o pasado 18 de xullo por axentes do posto de Carballo, coa colaboración dunha patrulla do posto de Rianxo.
Segundo informou a Garda Civil, ambos os detidos eran coñecidos polas forzas de seguridade pola súa presunta implicación en diversos feitos delituosos e, durante meses, realizaron manobras de evasión para dificultar a súa localización. A investigación permitiu saber que os fins de semana se desprazaban entre Carballo e Padrón en motocicletas de gran cilindrada co obxectivo de eludir posibles controis policiais.
Os dous homes foron finalmente localizados na terraza dun establecemento hostaleiro de Padrón, onde foron detidos sen que se rexistrasen incidentes. Tras pasar a disposición do Tribunal de Instancia de Padrón, decretouse o seu ingreso en centros penais. Segundo a Garda Civil, ambos tiñan pendentes condenas que suman ata cinco anos de prisión.
