CIG, CCOO e UGT denunciaron a “situación de bloqueo” da negociación do convenio colectivo do sector da hostalaría na provincia da Coruña. Así, anunciaron unha folga para o próximo 12 de agosto, o día do eclipse total de sol. Tamén será a xornada na que na cidade herculina se disputará o trofeo Teresa Herrera, coa participación do Real Madrid.
Confírmono este mércores nunha rolda de prensa na que interviñeron o representante da CIG, Marcos del Río; o de CCOO, Juan Zas; e o de UGT, Juan Carreira. Nela, explicaron que “despois dun ano e medio” desde a finalización do convenio e coas plantillas con “soldos conxelados desde o 1 de xaneiro de 2025”, “os empresarios insisten en recortar dereitos que xa están recoñecidos, como o complemento durante a baixa por enfermidade”.
A mobilización inclúe bares, restaurantes, hoteis, cámpings e “todo o relacionado coa comida, a bebida, o lecer e o aloxamento”, concretou Carreira, un colectivo no que traballan “arredor de 28.000 persoas”. Os camareiros, segundo detallou, cobran no nivel máis alto un soldo neto de 1.086 euros, algo que cualificou como un “abuso, chegando á escravitude da clase traballadora”.
ESÍXENLLE SERIEDADE Á PATRONAL
“Estamos para sentarnos a negociar melloras, unhas condicións laborais dignas e non para negociar perda de dereitos”, insistiu. “Non hai seriedade nin rigor por parte da patronal“, aseverou, pola súa vez, Marcos del Río, en representación da CIG, que considerou que a patronal procura “dilatar o tempo para evitar pagar os atrasos”. “Esiximos seriedade”, sinalou, mentres Juan Zas, en liña co manifestado polos demais representantes sindicais.
