O Concello da Coruña adxudicou o contrato para o Programa de Lecer Cultural do Instituto Municipal Coruña Espectáculos (IMCE), “que ofrecerá un servizo reforzado de actividades adaptadas os diferentes públicos durante todo o ano”, indica o goberno local.
O investimento para este curso aumenta e chega aos 279.642 euros, “dobrando a contía previa”, sostén. O número total de prazas para as persoas usuarias tamén se incrementará, situándose nas 11.205, un milleiro máis que o ano pasado.
No contrato, adxudicado á empresa Sportmadness Eventos, SL, inclúese un contido moi variado como talleres, programas de lecer de outono e primavera, os campamentos de Nadal e verán, as actividades de clausura, os talleres monográficos e o programa de sendeirismo.
O persoal profesional a cargo das actividades tamén aumentará. Haberá nove monitores que, ademais, terán formación especializada en Necesidades Educativas Especiais (NEE). En total, o programa incluirá o desenvolvemento de 27 talleres, incluídos catro talleres específicos para maiores, 12 sesións de outono e 14 de primavera dos ciclos temáticos.
