Defensa do Común mostrou o seu respaldo á proposta para a revisión de oficio dos acordos municipais de 1962, de alleamento da Casa Cornide.
Trátase dunha proposta que levará ao pleno municipal deste xoves e que, de ser aprobado, “aínda debe ser sometida a ditame do Consello Consultivo de Galicia para a súa posterior aprobación en pleno”, indica a entidade.
Nun comunicado, a plataforma cidadá asegura que na devandita proposición e nos informes emtidos quedan “acreditadas e suficientemente probadas causas de nulidade de pleno dereito para a revisión de oficio dos acordos plenarios de 1962”. Os mesmos, apunta, “permitiron e autorizaron a transmisión fraudulenta e ilegal da Casa Cornide á muller do ditador”.
Neste sentido, denuncia que “tan manifestas son algunhas das causas de nulidade de pleno dereito como igual de manifesta é a pasividade e inacción municipal, de décadas, en relación con este asunto”.
Ao seu xuízo, “esa pasividade de tantos anos podería prexudicar os intereses públicos municipais para a recuperación do inmoble, en especial na acción xudicial civil que interpoña o Concello para anular o título de propiedade do Franco e recuperar a Casa Cornide para o patrimonio público municipal”.
“Non queremos a estes franquistas dando nomes a rúas, nin como Fillos Predilectos da Coruña porque foron persoas ao servizo da ditadura, que participaron na represión, como recolle o informe elaborado polo Instituto José Cornide de Estudos Coruñeses por encargo do propio concello da Coruña. Estamos ante un claro incumprimento da Lei de Memoria Democrática aprobada hai case catro anos”, denuncian.
Máis novas sobre a Casa Cornide
A Coruña anulará os acordos de 1962 que facilitaron o paso da Casa Cornide á familia Franco
A apertura da Casa Cornide ao público: queixas polas reservas para un inmoble “baleiro”
