O Concello da Coruña recadou 1.044.839,62 euros coa taxa turística no primeiro semestre de 2026, unha cifra que supera a previsión inicial de 950.000 euros. “Son datos moi claros e moi positivos”, destacou este xoves o concelleiro de Economía, José Manuel Lage, durante unha rolda de prensa convocada para facer balance da recadación. Segundo detallou, o 72% dos ingresos, 750.380 euros, proceden dos hoteis, mentres que outro 20%, 214.627 euros, corresponde aos cruceiros. O 8% restante, 79.831 euros, procede das vivendas de uso turístico (VUT), un ámbito no que, segundo recoñeceu Lage, “non se acadaron os niveis de recadación agardados”. Neste sentido, avanzou que o Concello porá en marcha unha “campaña de inspección” para detectar aquelas vivendas turísticas que non estean cumprindo co pagamento do imposto.
O 80 % IRÁ A LIMPEZA, SEGURIDADE, ZONAS VERDES E ILUMINACIÓN
No relativo ao destino dos fondos, Lage explicou que o 80% do importe recadado se empregará en mellorar a limpeza viaria, a seguridade, os espazos verdes e a iluminación. O 20% restante, que segundo precisou “non está suxeito a unha obriga legal”, destinarase a reforzar o Consorcio de Turismo co obxectivo de que A Coruña se converta no “principal destino urbano do noroeste peninsular”. O concelleiro insistiu ademais en que a implantación da taxa non tivo efectos negativos sobre a chegada de visitantes. “Non deixou de vir ningún cidadán por ter que pagar un euro máis”, asegurou, algo que, segundo recalcou, “era evidente e agora constátase con cifras”. Para Lage, os datos “confirman que a medida cumpre o obxectivo para o que foi creada”.
MÁIS TURISTAS EN XUÑO E XULLO
O responsable municipal destacou ademais que a recadación presentada non inclúe aínda os meses centrais do verán, correspondentes á tempada alta. Segundo explicou, en xuño e xullo houbo un 2,63% máis de turistas ca no mesmo período do ano anterior. No caso dos cruceiros, apuntou que as escalas aumentaron un 15,2%, mentres que a ocupación media estival se situou no 84,37%. Con estes datos, o Concello estima para o segundo semestre do ano uns ingresos de 1.510.000 euros procedentes da taxa turística. “A día de hoxe, os datos parciais que temos indican que A Coruña obterá preto de 2,5 millóns de euros en total en 2026”, avanzou Lage.
