A alcaldesa da Coruña, a socialista Inés Rey, convocará o PP para negociar o orzamento de 2027 despois de que os representantes do BNG non acudisen á reunión prevista para esta xornada no Palacio Municipal de María Pita.
Así o explicou a rexedora, en declaracións aos medios de comunicación, nas que sinalou que enviarán unha carta ao grupo municipal do PP para convocalos a un encontro e explicarlles “cales son as liñas” das contas municipais “e ver que puntos en común temos”. “Menos que co BNG, que é unha forza progresista”, sentenciou ao cualificar de “decepción” que esta formación non acudise á reunión. Tamén considerou unha “irresponsabilidade” que non quixesen “escoitar” as propostas desde as filas socialistas en relación coas contas do próximo ano.
“É máis necesario ca nunca que haxa altura de miras na política e que haxa responsabilidade”, aseverou para argumentar que o BNG, coa súa voceira municipal á cabeza, Avia Veira, “primou os intereses electorais fronte aos dos coruñeses”. En relación coas denuncias dos nacionalistas sobre “incumprimentos” nos acordos de investidura ou no orzamento deste ano, Inés Rey indicou que “o pacto orzamentario leva máis do 70 por cento executado” e que o Plan de Barrios conta xa “con máis de 83 actuacións”. Do orzamento de 2027, sinalou ademais que está centrado “en vivenda, nas actuacións nos barrios e na mellora da calidade de vida e a parte de convenios nominativos co tecido social e deportivo da cidade”.
POSTURA DO BNG
Desde o BNG xa confirmaran que non acudirían ao encontro. En rolda de prensa, a súa voceira municipal Avia Veira sostivo que o goberno local “segue sen escoitar a cidade” e sen “avances” no acordo orzamentario de 2026. “Teñen todo un orzamento por cumprir, é imposible para nós pensar en ningún tipo de acordo de cara a 2027”, criticou tras confirmar que “non só non se rectificaron certas políticas senón que nalgún caso foron a peor”.
“Ten tres meses para cumprir o acordo orzamentario de 2026 e está claro que non ten vontade de facelo”, sentenciou nas súas declaracións para recalcar que a postura do BNG “non é un paripé, é unha decisión firme”.
REACCIÓN DO PP
Pola súa banda, desde o PP reclamouse que o PSOE e o BNG “deixen de utilizar parvadas preelectorais nas que ninguén cre para desviar a atención dos problemas de vivenda, inmobilidade, inseguridade ou sucidade”. “Inés Rey está cometendo outro erro ao convocar unha reunión para desviar a atención dos problemas da xente da Coruña e non lle importa aprobar os orzamentos porque non os executa e porque sabe que o BNG a apoiará despois das eleccións municipais se o necesita”, sinalan nun comunicado.
“Avia Veira votou en contra da nosa emenda ao orzamento de 2025 por motivos de execución, en 2026 votou a favor dun orzamento que incluía unha previsión de déficit de 21 millóns de euros e a falta de execución que agora alega foi unha constante desde que Inés Rey está no goberno”, apuntan tamén.
