Os sindicatos CCOO, CIG e UXT, que integran a mesa negociadora do convenio provincial de transporte de mercadorías por estrada na provincia da Coruña, anunciaron un novo calendario de mobilizacións durante este mes ante a ruptura das negociacións coa patronal desde o pasado mes de xuño e a perda de poder adquisitivo do sector. As protestas celebraranse o día 9 en Santiago de Compostela, o 15 na Coruña e o 22 en Ferrol, todas elas ás 11.00 horas. “Actualmente a mesa de negociación está rota e a patronal non se puxo en contacto connosco para as negociacións”, recalcou o secretario xeral do sindicato comarcal da FSC-CCOO da Coruña, Jorge García. Fíxoo nunha rolda de prensa na que estivo acompañado polo representante de UXT Iván Cancela e polo representante da CIG Ignacio Pavón.
UNS 10.000 TRABALLADORES AFECTADOS
O colectivo comprende arredor de 10.000 traballadores na provincia, entre persoal de camións, furgonetas e repartición. Os sindicatos reclaman un incremento salarial “superior ao IPC”, así como melloras nos horarios. “É un sector que arrastra unhas perdas adquisitivas dun 13 % nos últimos 15 anos”, especificou García. O representante sindical lembrou que o pasado ano conseguiron un incremento salarial do 4 % e explicou que a intención é continuar recuperando poder adquisitivo este ano. Os sindicatos reclaman tamén cambios na remuneración das horas realizadas en condicións especiais. García pediu que “as horas nocturnas e de fin de semana non se paguen como unha hora normal”. “Isto non é unha tarifa plana”, criticou.
