A Xunta ofreceu a súa colaboración ao Goberno central para a posta en marcha da sede da Axencia Estatal de Supervisión de Intelixencia Artificial (AESIA) na cidade da Coruña.
Este mércores, a directora da Oficina de Apoio Estratéxico e Planificación da Axencia para a Modernización Tecnolóxica de Galicia, María Bobillo, participou nunha xornada celebrada en Madrid sobre a ‘Axenda España Dixital 2026’ na que tamén estivo o director xeral de Dixitalización e Intelixencia Artificial do Ministerio de Asuntos Económicos e Transformación Dixital, Salvador Estevan.
Alí, segundo recolle un comunicado, a representante do Goberno galego tendeu a man ao Executivo central para botar a andar a sede da AESIA na cidade herculina e incidiu na importancia de que as distintas administracións participen nos órganos de goberno desta axencia.
Bobillo defendeu na capital estatal que o desenvolvemento da intelixencia artificial debe asentarse sobre os alicerces da “ética” e a “fiabilidade”, para o que ha de contarse coas administracións autonómicas nos ámbitos que son da súa competencia, como a educación ou a sanidade.
Así, puxo o foco en avances logrados en Galicia ao longo da última década coa implantanción de novas tecnoloxías no ámbito educativo, sanitario ou xudicial, á vez que fixou como retos de futuro a xestión intelixente de datos, un dos obxectivos fixados na Estratexia Galicia Dixital 2030 elaborada pola Xunta. Neste sentido, enxalzou que Galicia sexa “unha do tres primeiras comunidades” de todo o Estado que dipsonen dunha “estratexia propia” de intelixencia artificial.
