Néstor Rego (BNG) reclama a derrogación da Lei Mordaza e sitúa o 29N como un “momento decisivo” para avanzar neste obxectivo
Miles de manifestantes saíron ás rúas das sete cidades galegas este domingo para protestar contra a “violencia policial” do pasado mércores, durante as protestas pola visita do líder de VOX, Santiago Abascal, á Coruña, tras a cal se produciron disturbios entre a cidadanía e a Policía Nacional que remataron con persoas detidas e feridas. “Galicia será a tumba do fascismo”, exclamaron.
As concentracións, convocadas por Galiza Nova, tiveron lugar de xeito simultáneo ás 12.00 horas fronte ás subdelegacións do Goberno na Coruña, Pontevedra, Ourense e Lugo, na Praza Roxa de Santiago; na Farola de Urzaiz de Vigo; e na Praza Amada García de Ferrol. Todas elas transcorreron sen incidentes, agás un momento de tensión na Coruña entre un mozo que acudiu coa cara parcialmente tapada e exhibindo unha bandeira de España de poucas dimensións. Finalmente, foi apartado da protesta.
Ao berro de “Galicia será a tumba do fascismo”, “Contra a represión autogoberno” ou “Vox e PP a mesma merda é”, decenas de manifestantes clamaron na capital galega contra a represión policial e por “botar das rúas o fascismo”. A protesta contou co apoio da CIG, coa presenza do seu secretario xeral, Paulo Carril, e do BNG, co deputado no Congreso, Néstor Rego, e a deputada no Parlamento galego e nova concelleira compostelá, Saleta Chao, entre outros.
En declaracións aos medios, Rego defendeu a liberdade de manifestación fronte a actuacións policiais “claramente inxustificables e desproporcionadas” e celebrou que a mocidade galega se mobilice polos seus dereitos e por ter unha vida digna. “Estamos orgullosos desta mocidade“, subliñou. A raíz disto, reclamou a derrogación “dunha vez por todas” da Lei Mordaza. “É incomprensible que o actual Goberno, que se comprometeu a derrogala no primeiro mes, leve oito anos sen facelo e que ademais a aplique moitas veces de forma contraria aos intereses das maiorías sociais e das clases populares”, salientou.
Neste sentido, o nacionalista galego comprometeuse a seguir traballando para que esa derrogación se produza e fixou as eleccións do 29 de novembro como un “momento decisivo” para logralo. Con este fin, chamou a mobilizarse tamén nas urnas para conseguir que o Bloque acade unha maior representación nas Cortes Xerais e poder así “conquistar novos dereitos sociais e democráticos”.
GALICIA “ANTIFASCISTA”
Pola súa banda, o secretario xeral de Galiza Nova, Artai Gabiás, asegurou que estas concentracións pretenden trasladar que a maioría da sociedade galega e, especialmente a mocidade, é antifascista. “Aquí non teñen cabida os discursos de odio e ultraespañolistas que pretenden introducir VOX para dividir as clases populares”, remarcou.
Nesta liña, sinalou que a mocidade galega ten claro que os problemas actuais “non son culpa das persoas migrantes, do feminismo nin de ser unha nación”, senón consecuencia do sistema capitalista e da dependencia política do Estado. Polo tanto, Gabiás animou a promover a organización e seguir respondendo de forma pacífica nas rúas contra a presenza de organizacións fascistas e a loitar pola soberanía de Galicia.
Preguntado polos medios ao respecto da querela anunciada por VOX pola manifestación en contra da visita de Abascal á cidade herculina, o portavoz de Galiza Nova foi taxativo: “Estamos orgullosos de que unha organización fascista, racista, homófoba, machista e ultraespañola se querele contra Galicia Nova, porque iso significa que estamos fronte a eles, que representamos o contrario, que estamos nas rúas polas liberdades democráticas e polos dereitos das persoas, e iso é un motivo de orgullo para toda a organización”.
LECTURA DO MANIFESTO
Como peche das concentracións, procedeuse á lectura dun manifesto, no que Galiza Nova cargou contra a violencia policial do pasado mércores, episodio no que resultaron feridas “múltiples persoas”. “Non é un caso illado”, lamentaron, asegurando que levan anos vendo os policías como “brazo executor da represión” contra calquera discurso que “faga tremer os alicerces do réxime do 78”.
Así, denunciaron que desde a aprobación da Lei Mordaza son “múltiples os exemplos” nos que as Forzas e Corpos de Seguridade do Estado recorreron á violencia para silenciar as manifestacións a prol da democracia ou dos dereitos sociais. Galiza Nova puxo o foco no empobrecemento das condicións de vida, na suba do prezo do alugueiro e nas dificultades para acceder a unha vivenda digna. Unha situación que, aseguraron, “se agrava” polo “desmantelamento dos servizos públicos” nas mans de “PP e VOX”.
Fronte a iso, defenderon un movemento nacionalista galego que traballe por un proceso real de transformación social e encamiñado á construción dun territorio no que se poida vivir “dignamente” e cos dereitos sociais garantidos. “Sen subordinacións nin dependencias de intereses alleos nin do gran capital”, salientaron.Finalmente, chamaron a participar na folga xeral convocada polos sindicatos para o vindeiro 11 de novembro. “Non á represión policial. Fóra o fascismo españolista das nosas rúas”, concluíron.
