Varios cidadáns arriscaron este domingo as súas vidas para rescatar a unha muller arrastrada polo mar na praia de Riazor, na Coruña, para a que ademais solicitaron asistencia sanitaria tras o sucedido.

O 112 Galicia tivo coñecemento dos feitos ás 13.45 horas. Daquela, un particular indicou que a muller se atopaba na auga e que, ao seu entender, non era quen de saír por si mesma. Na súa chamada, explicou que foron varios dos presentes os que se encargaron de sacala de alí. O alertante solicitou a través da central asistencia sanitaria para esta muller. Finalmente, ata o lugar desprazáronse persoal do 061 e efectivos da Policía Local.