A ANPA do Conservatorio de Culleredo emitiu un comunicado no que “celebran” o anuncio do alcalde de Culleredo da contratación dun profesor de piano, pero pregúntalle o significado do termo “inminente” xa que o alumnado leva máis de cinco meses sen clases e pagando un servizo que non se lle presta.
“Levamos un curso agardando que o Concello solucione a falta de profesorado dos nosos fillos, sen que ninguén nos diga unha data para que se cubran as prazas”, sinalan fontes da ANPA. Así, rexeitan as acusacións de Rioboo de que se estaba a “politizar a protesta” pola proximidade das eleccións municipais. “Debería o alcalde lembrar cantas veces lle pedimos que resolvera a situación e deixouna pasar, agora di que non nos podemos concentrar porque politizamos, o que esiximos son solucións“, manifestan.
Finalmente, a ANPA insiste que a súa función é “defender un servizo público de calidade, pagado polos impostos da veciñanza de Culleredo” e que non van permitir o seu desmantelamento “porque os mozos e mozas de Culleredo merecen ter as mesmas oportunidades de formación que os que estudan noutros conservatorios da provincia”.
