O secretario xeral do PSdeG, Valentín González Formoso, instou aos críticos coa candidatura encabezada pola alcaldesa herculina, Inés Rey, para as próximas eleccións municipais a “pensar na sociedade”, ao ser preguntado pola impugnación da lista por parte dun grupo de militantes.

A preguntas dos xornalistas, coincidindo coa súa presenza nun acto como presidente da Deputación coruñesa, destacou o feito de que a lista saíse por “aclamación”, algo que para Formoso fala “en por si”.

“O que quere o PSOE na cidade é que pensemos na sociedade, hai que fortalecer o proxecto”, remarcou. “Non somos un fin en nós mesmos, somos un medio para a propia sociedade”, engadiu o secretario xeral dos socialistas galegos para quen Rey dotou á cidade herculina de “liderado”.

“Esta cidade necesitaba recuperación da identidade, de confianza, e isto conseguiuno con este goberno”, incidiu Formoso, quen manifestou que Inés Rey “devolveu a ilusión á cidade”.