O BNG demandou á Xunta incoar “de maneira inmediata” o expediente de declaración como Ben de Interese Cultural (BIC) do pazo de Meirás, en Sada, ante o permiso da Xustiza aos Franco “para retirar algúns dos ata 700 elementos mobles que forman parte do patrimonio do pazo no seu conxunto”.
A súa deputada Mercedes Queixas emprazou á Xunta a actuar “con urxencia” na incoación do mesmo “para protexer algúns dos elementos mobles como, por exemplo, varios conxuntos isabelinos, os angelotes de bronce ou as lámpadas sobre pilastras”. “Non se pode explicar o pazo de Meirás sen todo o seu conxunto patrimonial completo”, engade.
Estas pezas son “elementos inseparables”, segundo a parlamentaria coruñesa, do conxunto íntegro da inmoble residencia da escritora Emilia Pardo Bazán e, posteriormente, residencia oficial do ditador Franco. “A ausencia destas pezas afecta sen dúbida ao propio significado e o que representa o pazo de Meirás”, remarca fronte ao cal reiterou a súa urxencia en que o Executivo galego incoe este expediente BIC para a protección de todo o conxunto patrimonial do pazo de Meirás.
En concreto, a partir do 26 de xuño, os Franco poderían retirar do inmoble os anxos de bronce da capela, unha virxe, cuxa retirada xa permitira o Xulgado de Primeira Instancia número 1 da Coruña.
