A portavoz da Marea Atlántica no Concello da Coruña, María García, manifestou, sobre a reunión do presidente da Xunta, Alfonso Rueda, e a alcaldesa, Inés Rey, que o titular do Executivo galego “marchou da Coruña con promesas que soan a vello e ningún compromiso en vivenda, mobilidade ou xustiza social”.
Como “decepcionantes” definiu María García os resultados do encontro celebrado este martes, na Delegación Territorial da Xunta na Coruña, “no que se limitaron a repetir acordos xa anunciados”, dixo sobre a comparecencia ante os medios de comunicación. “Tras tres anos e medio sen un só avance, anunciar un concurso de ideas para o centro de saúde en Santa Lucía parece unha broma de mal gusto”, indica María García.
Ademais, sinala que “o compromiso do goberno galego coa Coruña é tan baixo desde hai anos que calquera investimento ten que ser recibido como unha boa noticia, pero ao final Rueda marchou da Coruña con promesas que soan a vello”, resume, avanzando que no pleno do 13 de outubro preguntarán pola reunión e o seu contido.
Respecto diso, sinala que os acordos trasladados “non se corresponden coas expectativas xeradas polo encontro e limítanse a repetir compromisos xa adquiridos e anunciados, é o caso do albergue de peregrinos na antiga Comandancia de Obras, cita tamén como exemplo.
Por outra banda, ante o encontro de Inés Rey co presidente do Goberno, Pedro Sánchez, no consistorio coruñés — antes do cume hispano-alemá– afirma que espera que a alcaldesa consiga “compromisos reais para A Coruña, compartidos nos Orzamentos 2023, e comezando pola humanización de Alfonso Molina e a condonación da débeda do porto”.
BNG
Tamén o portavoz municipal do BNG no Concello da Coruña, Francisco Jorquera, limitou a “obras xa en marcha ou reiteradamente anunciadas” os acordos entre o presidente da Xunta, Alfonso Rueda, e a alcaldesa, Inés Rey. “Non pasan de ser meras declaracións de intencións”, dixo sobre o contido da comparecencia. Ademais, asegurou que nos temas tratados na reunión houbo “ausencias clamorosas”. “Por exemplo, en materia de vivenda”, engade.
En canto ao porto e o futuro dos peiraos, para o BNG o goberno local “parte dun erro de enfoque”. “A cuestión”, razoa Jorquera, “non é quen ten que ser o titular dos terreos e canto se está disposto a pagar para facerse coa titularidade”. “A cuestión é se Concello, Xunta e Goberno central están dispostos a involucrarse na transformación do porto, participando nun consorcio e en canto están dispostos a contribuír”.
“Propúxollo a alcaldesa a Alfonso Rueda, vaillo propor a Pedro Sánchez'”, pregúntase Jorquera, quen insta a alcaldesa a que na reunión de hoxe co presidente do Goberno “coloque a cuestión da condonación da débeda do porto ou a adopción dunha fórmula alternativa”.
