O Concello da Coruña implantará as zonas de baixas emisións na cidade, en cumprimento das pautas marcadas pola Lei de Cambio Climático e Transición Ecolóxica, sen que implique “máis restricións ao tráfico de vehículos nin á segregración dos mesmos por tipo de combustible”.

Desde o día 6, sinalizaranse dúas zonas de baixas emisións na cidade: a Mariña e a Cidade Vella. As dúas xa tiñan restricións ao tráfico de vehículos, só permitidos para residentes e para o transporte público, polo que non haberá cambios, informa o consistorio.

Ademais, explica que isto se engade aos cambios nos últimos anos coa creación de zonas peonís e de tráfico restrinxido “polo que se cumpre e mellóranse os parámetros para o establecemento de zonas de baixas emisións”.

Noutra orde de cousas, o consistorio informou este luns de que se completou a restauración do reloxo monumental do edificio do IES Eusebio da Guarda, dentro do plan de recuperación do patrimonio.