A Autoridade Portuaria da Coruña licitou por 201.000 euros unha obra para habilitar un acceso directo de vehículos ao peirao de Transatlánticos desde a Avenida do Porto, co obxectivo de achegar unha nova alternativa á circulación rodada que está vinculada ás escalas de cruceiros, especialmente aos autobuses turísticos.

Nun comunicado, a entidade explicou que as escalas de cruceiros xeran unha circulación de vehículos que na actualidade ten que atravesar os peiraos de Batería e Calvo Sotelo. “No entanto, co fin de complementar esta ruta, habilitarase unha conexión directa entre o peirao de Transatlánticos e a Avenida do Porto, no cruzamento regulado con semáforos que dá acceso ao parking dos Cantóns Village”, engadiu o Porto.

A obra, que xa foi autorizada pola Dirección Xeral de Patrimonio da Xunta, foi planificada de acordo cos servizos de Mobilidade do Concello da Coruña. O seu orzamento é de 201.000 euros e terá un prazo de execución de tres meses, polo que estará finalizada o próximo verán.