A canle de Youtube do BNG da Coruña estreou este martes a segunda entrega da súa sección “Un café con…”, desta volta protagonizada pola concelleira nacionalista Avia Veira, responsábel no grupo municipal de materias como Mobilidade, Urbanismo, Vivenda, Cultura e Política Social.
“A Coruña ten un enorme potencial, mais este Goberno Local é incapaz de lle dar o impulso que a cidade necesita”, afirma a concelleira nacionalista nesta conversa. “É un Goberno Local centrado en grandes titulares, en grandes eventos”, pero que logo falla “na política máis elemental da cidade”.“Non hai proxecto nin cultural, nin urbanístico, nin de mobilidade nin de vivenda”, engade.
Avia Veira apunta xa as inminentes eleccións municipais de 28 de maio e fai unha chamada á cidadanía coruñesa para que apoie ao BNG. “Temos claros cales son os problemas da Coruña, mais tamén cales son as solucións”, destaca na entrevista.
Entre as grandes prioridades do seu grupo está o da mobilidade, urbanismo, vivenda e asuntos sociais. Tamén aposta por impulsar un maior tecido cultural.
