Air Europa cancelou 14 voos este luns, primeira xornada da segunda rolda de folga de pilotos, que se estenderá durante os días 22, 23, 25, 26, 29 e 30 de maio e o 1 e 2 de xuño. Dos cales, dous tiñan destino ou orixe o aeroporto galego da Coruña.

En concreto, os voos cancelados cobren as rutas de ida e volta entre Madrid e Bilbao, A Coruña, Palma, Roma, Milán e Málaga, así como a ruta entre Barcelona e Palma. Para o resto de días, a aerolínea tamén cancelou 14 voos por xornada, a excepción do 30 de maio (18 voos) e o 2 de xuño (12 voos).

A través da súa web, Air Europa pide desculpas aos pasaxeiros polos “inconvenientes que esta situación ocasione”, polo que ofrece como alternativas para os pasaxeiros afectados que cambien a data para voar nos 30 días posteriores á data do seu voo orixinal e na mesma ruta, que cambien de destino a outro operado por Air Europa, dentro dos tres días anteriores ou posteriores á data orixinal do seu voo ou solicitar un vale co importe do billete.