Os grupos de Sumar e BNG quixeron alzar a voz trala celebración dun cara a cara dos tempos do bipartidismo.
A cabeza de lista de Sumar pola Coruña, Marta Lois, sinalou que o debate demostrou que “máis que nunca é necesario o estilo Yolanda, con solvencia nos datos, propondo solucións aos problemas, apelando ao diálogo”. Lois manifestou que a “política é moito máis que dous homes dándose zascas” e lamentou “o ruído, que fose bronco” e que “se falou pouco de controlar o aluguer, o SMI, a saúde bucodental, e de saír unha hora antes de traballar”.
Así mesmo, no mesmo audio remitido aos medios, Lois conveu que é “unha vergoña que a JEC permitise este debate onde máis do 40 por cento do hemiciclo quedou fóra e non se viu representado”.
Pola súa banda, o candidato número uno do BNG pola provincia da Coruña, Néstor Rego, fixo un chamamento a votar ao Bloque ás persoas “defraudadas” co trato dos partidos estatais a Galicia.
Nun acto en Ames, Rego criticou que partidos de ámbito estatal demostraron, ao seu xuízo, ter un comportamento “sumiso e bipolar” porque votan de forma diferente no Parlamento galego e no Congreso. “O único voto útil é o do BNG porque defende os intereses do noso país”, afirma o candidato nacionalista pola Coruña.
Por iso, apela a votar ao Bloque para que Galicia “teña unha voz propia e forte en Madrid e pór freo á dereita”. “Por iso animamos a coller a papeleta do 2×1. Non hai voto máis útil en Galicia que o voto ao BNG: o único que defende os intereses galegos en Madrid e que, ao tempo, vai contribuír a evitar un goberno de dereitas no Estado”.
