O presidente da Xunta, Alfonso Rueda, reafirmou a aposta do Goberno galego en materia de vivenda e informou da autorización da licitación de 40 novas vivendas de promoción pública (VPP) en terreos localizados en Xuxán, na cidade da Coruña.
Segundo explicou ao termo do Consello da Xunta, a previsión é que a Administración autonómica investirá nelas 7,7 millóns de euros. Na súa intervención, remarcou que se trata de dar “un paso máis” nunha cuestión “fundamental para a cidadanía”. Por iso, salientou que esta iniciativa se enmarca no “gran esforzo” que hai cada ano o Goberno galego en promover novas vivendas protexidas e en rehabilitar inmobles destinados a aluguer social.
Tamén situou o compromiso dentro da estratexia en materia de vivenda que o Goberno galego aprobou hai uns meses no Consello da Xunta. “Marcabamos como un dos obxectivos principais incrementar nun 50% o parque público residencial, ata chegar ás 5.600 vivendas no 2026″, lembrou.
