Unha vintena de estudantes da Coruña inician a súa estancia dun mes en Irlanda co programa municipal ‘Idiomas do Mundo’.
A concelleira da área de Benestar Social, Yoya Neira, e o concelleiro de Educación, Emprego e Relacións Institucionais, Juan Ignacio Borrego, despediron este luns no centro xuvenil O Remanso aos 20 alumnos e alumnas de primeiro de Bacharelato que inician a súa estancia dun mes en Irlanda.
Os mozos, segundo informa o Concello da Coruña, residirán ata o 21 de agosto na localidade de Malahide, a 16 quilómetros de Dublín, en casas de familias seleccionadas polo programa. Pola mañá, acudirán a unha escola de idiomas e polas tardes e fins de semana, desenvolverán distintas actividades.
Os estudantes, engade, estarán acompañados por dous monitores que servirán de “ligazón” entre os participantes coas familias e a escola, así como para organizar as actividades. Desde o ano 2006, segundo lembrou o consistorio, un total de 308 alumnos coruñeses puideron perfeccionar os idiomas de inglés, francés e portugués en estancias deste programa en Irlanda, Francia e Portugal.
Noutra orde de cousas, o Concello da Coruña acometerá este verán 135 actuacións de mantemento en centros educativos da cidade herculina para “adecualos ao novo curso” e dar solución ás “incidencias” comunicadas polas escolas.
