A concelleira do BNG no Concello da Coruña Avia Veira denunciou “anomalías e irregularidades” na tramitación por parte do concello da licenza para a realización do festival ‘Wake Up and Dream’, no Parque de Bens, algo que negou o goberno local que defendeu que o proceso foi legal.

En rolda de prensa, Avia Veira argumentou que “se traspasaron todos os límites” e engadiu que “non van tolerar que algo así volva ocorrer”, tras cualificar o proceso de “trapallada”.

Entre outras cuestións, sostivo que houbo “unha total falta de respecto polos procedementos que deberían garantir a preservación do Espazo Natural de Interese Local das Illas de San Pedro”. Tamén argumentou que se venderon as entradas “moito antes de que se solicitase a licenza”.

Pola súa banda, o concelleiro de Fomento e Promoción da Cidade, Gonzalo Castro, manifestou, a preguntas dos xornalistas, que a licenza desa actividade foi “absolutamente escrupulosa” e que se respectou “a legalidade e todos os requisitos de seguridade e de respecto acústico que establece a lei”.
“Hai informes ambientais favorables, algo que obvia o BNG, informes favorables desde o punto de vista acústico a condición de que se establecese unha serie de medidas correctoras que se obrigou a facer aos promotores”.