O Ministerio de Transportes, Mobilidade e Axenda Urbana (Mitma) obtivo a Declaración de Impacto Ambiental (DIA) favorable ao anteproxecto para a construción dun viario de conexión entre a autovía AC-14 (Ligazón da Zapateira) coa autoestrada AP-9, na Coruña.

Segundo o publicado no Boletín Oficial do Estado (BOE), o Ministerio para a Transición Ecolóxica e o Reto Demográfico, en calidade de órgano ambiental competente, formulou a DIA, “pronunciándose sobre os impactos asociados ao anteproxecto, así como os efectos sobre os factores ambientais derivados da súa vulnerabilidade”. Así mesmo, inclúe o proceso de participación pública e consultas, explica Transportes.

Ademais, engade que Mitma poderá avanzar cara á aprobación do anteproxecto para iniciar, a continuación, a redacción do proxecto de trazado, “o cal será sometido posteriormente ao trámite de información pública”.

A avaliación realizouse para o nivel de detalle correspondente a un anteproxecto, segundo o disposto na Lei de Estradas. A adecuada avaliación dalgúns impactos ambientais do proxecto construtivo que, posteriormente, desenvolva este anteproxecto require que o promotor realice análises adicionais adecuados ao seu superior nivel de detalle.

O ramal de conexión AC-14/AP-9 obxecto de estudo está incluído dentro do Plan Sectorial da rede viaria da Coruña, Arteixo, Culleredo, Cambre, Oleiros, Sada e Bergondo, como plan sectorial de incidencia supramunicipal e busca contribuír á redución dos problemas de conxestión de tráfico nas horas punta de entrada e saída da cidade da Coruña.