O Goberno galego autorizou a declaración como iniciativa empresarial prioritaria do proxecto Arteixo H2V impulsado pola sociedade Accionaplug –promovida por Acciona Enerxía e Plug Power– para a construción dunha planta de xeración de hidróxeno verde no concello coruñés de Arteixo, cun investimento de 49,3 millóns de euros.

A planta, que se situará no polígono de Morás, contará cun electrolizador de catro módulos de 5 MW cada un cunha capacidade produtiva efectiva media de 2.982 toneladas de hidróxeno verde ao ano.

Para a súa produción usarase enerxía eléctrica de orixe totalmente renovable xerada no parque eólico Monteagudo –de nova construción– complementado con enerxía proveniente da propia rede eléctrica a través dun acordo de compra de enerxía (PPA).