O Concello da Coruña promove un dispositivo especial de transporte urbano con vistas á noite de Fin de Ano, na que se reforzará o servizo nocturno de autobús.

Neste sentido, o domingo 31 de decembro está previsto que os últimos servizos saian das súas respectivas cabeceiras de liña ás 21,30 horas, para retirarse posteriormente ás cocheiras unha vez que se complete a súa última quenda, entre as 22,00 e 22,15 horas.

Xa durante a Noitevella, activarase o dispositivo especial do autobús-bufo, que estará operativo entre as 00,30 e as 7,30 horas do día 1 de xaneiro. Nesta franxa horaria haberá dous vehículos dispoñibles, un deles manterá o servizo habitual, mentres que o segundo, de reforzo, fará o mesmo percorrido circular en sentido contrario.

Están previstas frecuencias de 30 minutos ata a conclusión do dispositivo, ás 07,30 horas do luns 1.