A estación de tren da Coruña volveu este venres á “normalidade” tras quedar resolto o fallo eléctrico que afectou á súa operatividade ao longo da xornada do xoves, e que provocou un gran caos no sistema ferroviario galego.

Renfe e Adif confirmaron que, unha vez resolta a avaría e tras as pertinentes comprobacións realizadas no “período de banda nocturna” (intervalo de tempo no que non circulan trens), os servizos que teñen como orixe ou destino a estación coruña están a prestarse sen incidencias.

A estación da Coruña tivo que suspender os seus servizos este xoves á primeira hora da mañá por un fallo eléctrico que afectou os sistemas de sinalización e de control do tráfico ferroviario. A media mañá, técnicos de Adif lograron habilitar dúas vías para circulación con limitacións, pero a incidencia afectou os servizos ferroviarios ao longo de toda a xornada.

De feito, Adif confirmou que resultaron afectados 38 trens de media distancia, dos que 12 foron “suprimidos parcialmente”; así como 5 trens de longa distancia (dous deles suprimidos parcialmente) e outros dous trens de mercadorías.

A última hora da tarde deste xoves, o administrador ferroviario informou de que se reparou provisionalmente a avaría e que se irían recuperando paulatinamente as frecuencias que quedaban. Este venres, Adif confirmou que o fallo quedou liquidado definitivamente durante a noite.

PODEMOS

Podemos preguntou no Congreso, para resposta por escrito, pola situación das instalacións ferroviarias na Coruña, despois de que este xoves un fallo eléctrico afectase á súa operatividade, o que impediu durante boa parte da xornada a chegada e saída de convoys. En concreto, Podemos trasladou á Mesa do Congreso a seguinte pregunta: “Situación das instalacións ferroviarias na Coruña, tendo en conta da paralización da entrada e saída de trens na data de hoxe (xoves 11 de xaneiro), por mor dunha caída de tensión e medidas que expón o goberno para garantir o correcto funcionamento das instalacións”.

BONOS

Por outra banda, Renfe emitiu en Galicia máis de 40.000 abonos durante o dez primeiros días do ano para poder viaxar nos servizos de proximidade ancho métrico, media distancia e Avant da  desde o 1 de xaneiro ata o próximo 30 de abril. Tal como indicou a compañía nun comunicado, estes abonos poden adquirirse en calquera momento durante o seu período de vixencia.