A Escola da Bici volve poñerse activa. Esta iniciativa impulsada por Mobi-liza (asociación por unha mobilidade responsable e sostible) para aprender a andar en bici e a circular pola cidade de forma segura, vén de anunciar os seus primeiros cursos para o ano 2024.

Falamos dun servizo absolutamente necesario que ten que ir paralelo ao continuo avance do carril bici e do fantástico servizo de BiciCoruña. Así, o ano pasado foron 312 as persoas (160 adultas e 152 nenos e nenas) que acodiron aos 57 cursos realizados pola entidade.

Dende a entidade seguen percibindo que nos cursos dirixidos a persoas adultas, “a meirande parte do alumnado son mulleres, o que responde a unha desigualdade no acceso á bicicleta que grazas aos nosos cursos podemos ir contribuíndo a que se minimice e, mesmo, se erradique”. Nese sentido, comentan que no caso de persoas de máis de 55-60 anos é moi evidente que non tiveron ocasión de aprender durante a súa infancia mentres que os seus iguais varóns si tiveron bicicleta.

Novos horarios por niveis

Para persoas adultas cóntase cun total de 4 cursos de niveis diferenciados durante o mes de febreiro, tratándose dos seguintes:

• Nivel 1 – Iniciación, dirixido a persoas que non saben andar en bici e desexan aprender. Este será luns 5, martes 6 e mércores 7, de 16:30 a 18:30. Segundo o seu presidente, Alejandro Voces, “este nivel marca un antes e un despois na vida das persoas que pasan por el, xa que en cuestión de días contan cunha ferramentas da que anteriormente non dispoñían: o poder andar en bici!”
• Nivel 2.1 – Habilidades (básico), dirixido a persoas que saben andar en bici pero precisan gañar unha serie de destrezas e habilidades para ter un maior dominio da bici. Este será venres 16 de 16:30 a 18:30, sábado 17 e domingo 18 de 12:00 a 14:00
• Nivel 3 – circulación, dirixido a persoas que teñen dominio da bicicleta pero precisan unha serie de nocións para circular de forma segura pola cidade. Este será Luns 19, martes 20 e mércores 21, de 16:00 a 18:00
• Nivel 2.2 – habilidades (avanzado), dirixido a persoas que saben andar en bici pero precisan gañar unha serie de destrezas e habilidades para ter un maior dominio da bici (sendo un curso máis avanzado que o 2.1 – habilidades). Este será Luns 26, martes 27 e mércores 28, de 16:00 a 18:00. Explican dende a entidade que este curso foi recentemente creado xa que “percibíamos que moitas das nosas alumnas e alumnos superaban con creces o nivel 2 (habilidades) pero lles daba respecto adentrarse no de circulación, polo que decidimos crear un paso intermedio que afonde en destrezas máis avanzadas”.

Poden poñerse en contacto en aescoladabici@gmail.com.

Multas

Ante a recente información ao respecto do número de multas interpostas a persoas usuarias da bicicleta na cidade (que ascendeu a 78 no ano 2023), entenden dende a asociación que estes cursos son unha das principais ferramentas para erradicar estas condutas sancionables. “Nos nosos cursos non só aprendes a pedalear e a manexar a bicicleta con destreza, senón que tamén realizamos unha labor importante de concienciación e formación ao respecto da normativa de circulación”. Neste sentido, indican que, segundo o nivel, introducen contidos teóricos que van dende os viarios e espazos polos que se pode circular en bicicleta ata as casuísticas que determinan a obrigatoriedade de determinados elementos de seguridade (como, por exemplo, luces, casco ou prenda reflectante) pasando por outras referidas a como actuar ante un paso de peóns ou un paso ciclista.

Máis novas a dúas rodas

O Taller Reciclos, o paraíso social para os amantes das dúas rodas

A Escola da Bici de Mobiliza ou como perder o medo a circular pola cidade