O Complexo Hospitalario Universitario da Coruña (CHUAC) foi recoñecido polo Ministerio de Sanidade con dous novos Centros, Servizos e Unidades de Referencia (CSUR) para o conxunto de pacientes do Sistema Nacional de Saúde, en concreto, foille outorgado o recoñecemento como centro de referencia nacional para o tratamento de tumores renais con afectación vascular en adultos e no referente ás enfermidades glomerulares, tamén en adultos.
Segundo trasladou a Xunta nunha nota de prensa, durante o 2023 o CHUAC atendeu a un total de 12 pacientes con tumores renais e afectación vascular da vea cava e rexistrou aproximadamente 1.200 consultas de enfermidades glomerulares complexas, das que se realizou un seguimento de 815 pacientes.
Desde 2008 o Ministerio de Sanidade designa centros, servizos e unidades de referencia para o conxunto do sistema sanitario nacional, de acordo coa súa capacidade asistencial, equipamento, nivel de especialización, profesionais e resultados de actividade, entre outros criterios.
Así, con estas dúas novas designacións, xa son 16 os centros, servizos e unidades galegas referentes para o conxunto do sistema sanitario español, no que destacan os Complexos Hospitalarios Universitarios da Coruña e Santiago de Compostela ao acoller 10 e seis CSUR respectivamente. Durante o ano 2022, estes centros realizaron 142 atencións a pacientes fóra de Galicia, unha cifra que ascende ata as 188 atencións en 2023.
UNIDADES GALEGAS RECOÑECIDAS
A Unidade de tumores intraoculares de adulto do Complexo Hospitalario Universitario de Santiago foi a primeira en ser recoñecida, en 2008, como CSUR dentro da rede sanitaria pública galega. A día de hoxe, este Complexo hospitalario acolle outros cinco CSUR nas súas instalacións: os de reconstrución da superficie ocular complexa, epilepsia refractiva, cirurxía dos trastornos do movemento, enfermidades metabólicas conxénitas e esclerose múltiple.
Pola súa banda, o Chuac alberga un total de 10. A unidade de queimados críticos, transplante pulmonar, transplante de páncreas, ortopedia infantil, cirurxía reparadora da válvula mitral, cardiopatías familiares en nenos e adultos, transplante renal cruzado, doante vivo para transplante renal cruzado, tumores renais con afectación vascular e enfermidades glomerulares.
O obxectivo dos CSUR é garantir a equidade no acceso e unha atención sanitaria de calidade, segura e eficiente a persoas con patoloxías complexas que necesitan coidados especializados. Por iso, estes hospitais actúan como centros de referencia para outros complexos en procedementos de alta complexidade ou intervencións superespecializadas que non poden ser cubertas polos mesmos.
