O concelleiro socialista Luís Vázquez renunciou á súa acta no Concello de Arteixo, unha decisión que toma, segundo informa, “obrigado polas circunstancias laborais”. Nun comunicado, explica que iso lle impide compatibilizar o seu labor de edil coa actividade profesional como viña facendo desde 2013 cando tomou posesión por primeira vez da súa acta.

Na súa despedida, destaca o labor dos compañeiros e compañeiras, “cos que tiven a sorte de traballar todos estes anos”, á vez que agradece a confianza dos veciños e veciñas. Luís Vázquez, que seguirá traballando na comisión executiva municipal dos socialistas de Arteixo, reivindica tamén o traballo dos grupos da oposición para “fiscalizar” a xestión do goberno.