Tras a dimisión do alcalde de Cambre, Óscar García Patiño, e a toma de posesión como alcaldesa de María Pan, o PSOE local trasladou que a súa condición para reeditar un pacto de goberno é xestionar a área de Contratación, xa que entende que o municipio “necesita un cambio de rumbo para reverter a situación de bloqueo”.

“Valoramos o traballo de María Pan, pero entendemos que a persoa que levaba a área de Contratación, e que agora ostenta a alcaldía, non é posiblemente a persoa máis idónea para desbloquear a situación creada, polo que, pensando na mellor solución para os veciños de Cambre, reclamamos que a área de Contratación pase a ser xestionada polos edís do PSOE como condición para reeditar o pacto de goberno”, explicaron os socialistas nunha nota de prensa.

Así mesmo, o PSOE local xustificou a súa abstención no pleno do venres porque o seu voto estaba condicionado a “xestionar a área de Contratación, un punto ao que non accederon”. Con todo, móstrase disposto a seguir traballando para “saír da situación de bloqueo administrativo na que se atopa o municipio”.