Xa non queda nada para a VI edición da Carreira da Luz, organizada polo IES Miraflores de Oleiros, e que se celebra o venres 26 de abril no Polígono de Iñás. Despois do éxito do ano pasado, conseguindo máis de 6.000€ para a Fundación Diego González Rivas, esta proba popular colaborará coa Asociación PANGONO PANGONO.
A carreira nocturna, ten como eixo fundamental ensinar os valores solidarios, deportivos e de convivencia. Así, nesta ocasión a liña de colaboración solidaria téndese coa asociación PANGONO PANGONO coa idea de levar a cabo un proxecto en Malawi, concretamente o proxecto “MiniVan Área 49” co que pretende dotar dun minibus propio ás mozas estudantes da residencia “Amai María”, da Área49 de Lilongwe (Malawi), para que estas poidan desprazarse e continuar coa súa formación nas escolas de secundaria e universidades da capital, evitando,así, o acoso sexual ao que se ven sometidas neses medios de transporte ateigados de xente, os retrasos, os excesivos prezos ou as frecuentes molladuras na época de choivas.
Desde o centro queren animar á participación masiva cunha motivación extra. Grazas aos patrocinadores que este ano axudan na organización ( Auditel, Asueto, Viaxes Sierra, Galitelco, Sup Mera, Clínica Facies de Perillo…) a lista de agasallos é un aliciente máis para participar. Ademais cada dorsal recibirá unha bolsa de abastecemento”.Para a rapazada, esas bolsas levarán algunha que outra sorpresa. Todos os gañadores e gañadoras das categorías superiores recibirán tamén un premio como recompensa ao seu esforzo.
Haberá inchables para os máis cativos, mercados solidarios, chocolate, doces caseiros e moitas sorpresas máis…
Xa te podes inscribir aquí na web do centro, ata o propio 26 de abril ás 20:00h.
Máis novas
