O secretario xeral do PSOE na provincia da Coruña, Bernardo Fernández, condenou os “ataques” que o secretario xeral das Xuventudes Socialistas (XSG), Xurxo Doval, recibe a través da rede social X nunha mensaxe de apoio ao presidente do Goberno e líder do PSOE, Pedro Sánchez.
“Están a atacarlle pola súa orientación sexual e faltando ao respecto por unha publicación en apoio ao presidente do Goberno”, explica en declaracións difundidas aos medios o tamén alcalde de Pontedeume, que lamenta que se trate de “un exemplo da miseria” na que está instalada a política.
O socialista asegurou que “o máis triste é ver como representantes das Novas Xeracións do PP se mofan destes ataques e chámano lloricas, entre outras cousas”. “Sería bo que alguén do PP, se é que queda alguén cun mínimo de responsabilidade e cun mínimo de respecto por aquelas persoas que poidan pensar de forma diferente ou que poidan ter opcións sexuais diferentes, tomase cartas no asunto”, sinala.
O secretario xeral dos socialistas coruñeses, que asegura “non esperar gran cousa”, atribúe os feitos “en gran medida á situación que se vive” no conxunto do Estado como “consecuencia das políticas e da actitude do PP”. Finalmente, traslada todo o apoio a Doval e sinala que estes actos son “totalmente reprochables” nunha democracia cara a calquera persoa.
Neste sentido tamén se pronunciou o secretario xeral do PSOE compostelán, Aitor Bouza, quen condenou estes “ataques nauseabundos”, que atribuíu á “lameira” no que “o PP instalou a política”.
“Xa cando se vai vilmente a unha persoa pola súa orientación sexual, o que demostran é que non teñen ningún argumento político para poder confrontar as ideas que defenden as XSG co seu traballo cada día”, indicou tamén en declaracións difundidas aos medios.
Critican tamén que a organización xuvenil do PP galego se burlase destes “ataques” en lugar de condenalos.
